شعر أختي م.يحيى ضميرية
مؤسف أن يفرق حطام الدنيا، بين الأخ وأخته، أو يتقاتل
عليه أخوان
(إشارة لأخي أبي أسامة جعلتني
أعيد النشر )
- لها، ولكل واحد، أو واحدة
من الحناين، فقدناه - وما أكثرهم -
*****
راح من الحناين واحدة
يا اختي ..
وراح من الحناين واحدة
يا اختي .. رح بتطولي ..
مش عايدة
ورح دق باب الدار ..
مابدي حدا يفتح
تاقلن : راكعة أو ساجدة
... وناطر عا باب الدار
مابدي حدا ..
ناطر تطلي هيك ...
بتياب الصلا
وتستقبليني...بألف أهلين ..
وهلا
وكلمة ... ياخيي ...
إسمعا ، وإتأملا
منك
كأنا بصدقها ..
كمالة صلا
-- -- --
حكيلي .....؟
شلونك ....؟
-- -- --
طولت ...! !
يومين صارلي ..
ماشفت منكن جدا
-- -- --
يا اختي ..
يقطع ها العمر ..قديش
وقاته قصيرة
وراكضين .. بها الفلا ..
-- -- --
وشو الفايدة
ن كسبت تلتين الدني
وخسرت كلمة حب ، أو كلمة حلا
وصار خيي..
ما بشوفو بالسنة مرة
وأختي – بالإسم- قدام بيتي قاعدة
-- -- --
بها العصر (سيدنا القرش )
.. صار فارس المهرة
أو..
تحت باطو لف سجادة صلا
والمسبحة .. ميه ،وحبه زايده
بتكملا
وقد مابدك شواهد شاهدة
لـ (سيد الحضرة)
مو وارده
للصار يفتي
ويجعل من الخي .. خاين
والأخت .. لـ حق خيا جاحدة
-- -- --
وين خيي ...
ان قلت (آخ)
يحط إيدو عا الوجع يبرا
وين خيي..
ان رددت إسمو .. مره
ردها عشرة
وين خيي.. ولمن منبقا سوا
ماهمنا ..لا اليوم
أو بكرة
وين خيي.. نقسم اللقمة سوا
متل ما كنا .. ببيت الضمنا
بالواقع الـ أحلى من الذكرى
-- -- --
مش هيك يا اختي خلاقنا
ولا ديننا
ولا وصية الوالد ،ولا ميراث
حضن الوالدة
-- -- --
ولا هيك نقلوا عن جدود الغابرين
ولا هيك كنا نا طرين
تا نلتقي ..
لما يخبرنا غراب البين
..وتتذكر الدمعة
العين الجامدة
أو نطلبا، وتهرب..
مامنا فايدة
العمر نسرق .. مش عايده
كنتي عليي .. جويده ..
مش جايدة
قالت : ..فرشتلك جنينة من حبق
وماكان في بيني وبينك ها الورق
تا نحط فوقه ..
ها الدموع الباردة
بتستاهل قلوب الـ ماشمت ورد ..أيام الربيع
ولا حسبت حساب العمر ،من إيدها
رايح يضبع
-- -- --
الخي .. متل جناح للطير ..
وإذا ..
ياطير .. لجناح انكسر
مابينفعو جناح الصنيع
-- -- --
روح احترق
مش عايده
رح نفترق
نحنا افترقنا ...يا قلب
والدرب
كل يوم ...
عم بتطول.. .. عم بتطول
...والحبايب .. صارت حكايات
ياقلب
لا توفر دموعك
ما إلا
من بعد فقدان الحبايب فايدة
-- -- -- ويارب
خلي لي البقوا يومين
يضووا طريقي بها العتم
أو يمسكوا بسواعدي
ماعدت ناطر غير
ها الحلم البقي
حلمي ،ورجايي
رغم إسرافي الشقي
بيقول : يمكن نلتقي
رح نلتقي
بجنة مافيها موت
ما فيها بكي
بجنة .. مافيها فراق
جنة خالدة
رايح أنا موعود
إنك عايدة
-- -- --
الخميس ،الثالثة والنصف عصرا ،توفيت أختي أم محمد
في 2 ذي الحجة 1430هـ /19 تشرين الثاني 2009م ،رحمها الله.
___________
م. يحيى ضميرية
تعليقات
إرسال تعليق